إيه هو البراندينج؟ وازاي بيفيد شركتك؟
البيزنس بيتكون من عناصر كتير عشان يطلع مظبوط زي ما الكتاب بيقول، وده معناه أن التسويق أساس البيزنس عشان تخلي منتجك أو خدمتك مميزة ومنفردة عن المنافسين، وهنا يجي دور أول وأهم خطوة في التسويق “تصميم العلامة التجارية” أو “براندينج”.
العلامة التجارية (Brand) هي واحدة من أهم أصول الشركة.
بس محتاجين الأول نعرف ايه هو البراند وأهمية البراندينج للبيزنس بتاعك وايه هي العناصر الأساسية عشان تبني علامتك التجارية وتديرها!
يعني إيه (Brand):
هي العلامة التجارية والصورة الكاملة لأي شركة أو منتج أو خدمة في عقول العملاء والمستهلكين، والصورة اللي بتيجي في دماغ الناس لما تسمع اسم العلامة التجارية أو تشوفها والطريقة اللي بتوصل بيها لقلب الجمهور بتاعك، زي لما أقولك براند التفاحة، مش محتاجين نسأل ايه اسم الشركة اللي جه في دماغك!!
أهمية (Branding) للبيزنس بتاعك:
- هوية مميزة: بتساعد العلامة التجارية على تمييز منتجك أو خدمتك عن المنافسين، لما تتصمم بشكل كويس، هتكون فريدة وتميزك على المدى الطويل.
- التأثير على قرارات الشراء: العلامة التجارية هي العنصر اللي بيحدد قرار الشراء عند المستهلكين. في دراسة من Razorfish سنة 2021 بتقول أن 82٪ من المستهلكين بيشتروا من العلامات التجارية اللي عندها علامة أقوى.
- الثقة والولاء: في وجود علامة تجارية قوية وإيجابية، نسبة العملاء اللي بيثقوا بمنتجاتك أو خدماتك بيكتروا، فبالتالي بيكون فيه فرصة أكبر لبقاء العملاء معاك لفترة أطول وهنا بتتبني الـ Brand Loyalty.
- تعزيز الذاكرة: الذاكرة البصرية والعقلية هي اللي بتساعد الناس عشان تتعرف على علامتك التجارية بسرعة وتفتكرها بسهولة، ففرصة اختيار منتجك تزيد.
- زيادة القيمة المالية: العلامات التجارية القوية بترفع القيمة المالية للشركة، يعني لو عندك علامة تجارية قوية ومُربحة، بيكون من السهل أنك تجذب المُستثمرين.
ازاي تبني علامتك التجارية (Brand Building)؟
هي عملية إنشاء أو تطوير للعناصر المختلفة و هنتكلم عن العناصر دي دلوقتي، ونشرها بشكل مكثف في كل قنوات التسويق الموجودة، عشان الناس تعرف العلامة التجارية بتاعتك ونوع البيزنس اللي بتقدمه.
العناصر الأساسية عشان تبني براند/بيزنس ناجح هي:
- شعار (Logo): الشعار هو الرمز اللي بيميز العلامة التجارية عن غيرها، وكل ما كان اللوجو بسيط وفيه معنى كان أقوى في تمييزه بالنسبة للعميل أو المُستهلك، وأسهل في التغيير على المدى البعيد.
- اسم العلامة (Brand Name): الاسم دايماً محتاج يكون مميز وتقدر تقراه بسهولة ولما العميل يسمع الاسم يعرف يميزك.
- شعار الشركة (Slogan): عبارة عن جملة تسويقية قصيرة بتعبر عن الشركة ورسالتها، زي “Just do it” جملة بسيطة وسهلة هدفها التشجيع.
- الألوان والأسلوب البصري (Color and Visual Style): الألوان والتصميم للعلامة التجارية ممكن يكون ليهم تأثير كبير على التعرف على العلامة بسهولة.
إدارة العلامة التجارية (Brand Management): هي باختصار شديد أنك تحافظ على سمعة العلامة وتراقب ازاي الناس بتستخدمها وبتتعامل معاها.
في النهاية، ممكن نقول أن البراندينج هي عملية ليها مراحل كتير كلها بتساعدك أنك تعمل وجود قوي لشركتك ومنتجاتها أو خدماتها، وده بيساعد في جذب عملاء أكتر وزيادة نجاحك في السوق وسط المنافسين.
في نهاية المقال شوية أسئلة محتاج تجاوبهم لنفسك… هل كانت بدايتك صح في تصميم علامتك التجارية؟ لو أه تمام، لو لأ، ايه الحاجة اللي شايف إنها ناقصاك؟
كل ده نقدر نجاوبك عليه وأكتر، تواصل معانا دلوقتي وحوّل شركتك لبراند ناجح وفريد.
