هذة المقالة مكتوبة بقلم دكتورة امتهنت صناعة المحتوي في مجال الدعايا والتسويق الإلكتروني، تقدم لكم خبرة 4 سنوات من العمل في مجال الدعايا والتسويق الطبي علي طبق من دهب.
والمقالة ديه موجهة للرد علي اسئلة دكاترة كتير بيسألوها لما شخص أو شركة يعرضوا عليهم خدمة الدعايا والتسويق علي مواقع التواصل الإجتماعي، الأسئلة ديه شاملة كل حاجة من اول “ايه اهمية ال Marketing بالنسبالي كدكتور؟” ولغاية “ال Marketing بكام النهاردة؟”.
المقالة ديه برضه مش علشان اقولك ان المكان ده احسن مكان هيعملك شغلك، خالص، أنا جاية اساعدك علشان أنا اصلاً متفهمة وضعك واحتياجاتك، فأنا جاية ارشدك علي الخطوات المظبوطة اللي المفروض تتحرك فيها وامتي بالظبط تاخد كل خطوة من دول .. يلا بينا نبدأ روشتة التسويق الإلكتروني لخدمة المجال الطبي.
ايه أهمية الدعايا والتسويق الإلكتروني لخدمة المجال الطبي؟
هنا المنطقي أني اشرحلك الفرق ما بين الدعايا التقليدية Offline Marketing -اللي زى البروشورز والكروت واليفط والevents- والدعايا من خلال مواقع التواصل الإجتماعي Online Marketing -اللي زى الويب سايت والفيسبوك والانستجرام واليوتيوب وغيرهم- وأن الدعايا التقليدية بتصرف كتير ونتيجتها قليلة لكن الدعايا الإلكترونية تكاليفها أقل وبتوصل أسرع ونتيجتها بتدوم سنين، علي قد ما الفرق ده صح علي الورق علي اد ما كل المسوقين المحترفين اتفقوا أن التسويق الإلكتروني عمره ما يغني عن التسويق التقليدي وأحنا شرحنا ده بإيجاز شديد في فيديو بعنوان “هل ده زمن الأونلاين الماركتينج بس؟”
بس زي ما اتفقنا من أول الكلام أنا مش جاية ابيعلك، أنا جاية اساعدك. وإجابة سؤالك هي بكل بساطة “تلبية رغبات المسئول عن المريض أو المريض نفسه”، يعني ايه؟
يعني بكل بساطة المريض هيدور عليك، هيدخل Google أو Facebook يدور لو انت ماكنتش موجود علي واحد من الاتنين مش هيعرف أنك موجود اصلاً، ده بيتعمل ازاي؟!
من علي Google maps بنحدد مكانك وبنطلب Verfication أو تأكيد يتبعتلنا وبعدها بنحط المكان ده علي صفحتك علي الفيسبوك وبالتالي كله بيكون مربوط ببعضه، وديه مقالة بتوضح اللى انا بقوله ده في نقط بسيطة.
تاني جزء هو المصداقية أو ال Credibility :
بمعني أنا كمريض لو دخلت الصفحة بتاعة الدكتور أو العيادة أو المستشفي لاقيت كل اللي عليها 100 لايك ومفيش بوستات بتنزل ولا ريفيوهات، هفكر تلقائياً انك دكتور مش شاطر حتي لو كنت أشطر دكتور في المجرة!
ده بيودينا لجزئية أنه لازم علي طول تكون موجود ببوستات بتعرف الناس علي المكان وعنك وعن الخدمات اللي بتقدمها وعن رأي الناس فيك وكلامهم وصور قبل وبعد والكلام ده بالأخص لدكاترة “التجميل، الأسنان، التغذية، العيون، النسا، والجراحة”
تالت جزء الانتشار:
وده جزء مهم جداً، لأن فيه اللي بيدور بس فيه اللي مابيدورش ومستنيك تطلعله تقوله أنا اهو، انا الدكتور اللي هيساعدك.
والحتة ديه هتتحقق لما تعمل إعلانات ممولة Paid Online Ads باستهداف مظبوط واستراتيجية واضحة واللي يدلك عليها Marketers وهي مبينة ببساطة زى ما قولتلك علي احتياج المريض أو الشخص المسئول عنه.
ايه نوع الMarketing اللي هيفدني اكتر؟
هو السؤال غلط بس خليني اقولك السؤال الصح وإجابته.
السؤال الصح “اسوق لنفسي ازاي بطريقة مظبوطة؟ “
1- انت مين؟
بمعني الدعايا لدكتور غير الدعايا لعيادة غير الدعايا لمستشفي! خليني اوضحلك اكتر:
لو انت دكتور فبنلجأ لنوع من الماركيتنج اسمه الدعايا الشخصية Personal Branding اللي بيكون فيها الدكتور هو ال Star ومش بس لازم ننزل فيديوهات وبوستات عن نوع الخدمة اللي الدكتور بيقدمها لا كمان الدكتور بيشارك شكل حياته الشخصية علشان يكون اقرب للناس اللي بتابع المحتوي اللي بيقدمه سواء لهدف التعلم أو لهدف العلاج؛ وممكن كمان يكون Influencer لدوا أو منتج معين موجود في مجاله. مثلاً من ضمن المنصات اللي اثبتت قوة جبارة في حتة ال Personal Branding هو ال TikTok بيوصل بشكل سريع وبقي عليه نسبة محترمة محتاجة تشوف محتوي قوي في اكتر من مجال ومع الدكاترة كمان تأثيره سحر.
أما لوده هيكون تسويق لعيادة فبنبدأ نسأل أسئلة زي: “هل العيادة ديه متخصصة في مجال طبي واحد ولا اكتر من مجال؟”، “هل فيها دكتور واحد ولا دكتورين ولا اكتر؟”، “هل ليا فروع أو فيه نية للتواجد في فروع تاني؟”، “هل العيادة هتقدم أفرات زي اللي بنشوفهم في عيادات التجميل وغيره؟”. بناءاً علي إجابات كل الأسئلة ديه بنبدأ نبني Marketing Strategy علشان نحقق الأهداف المرجوة من كيان العيادة. أكتر طريقة بنلجألها في التسويق الإلكتروني للعيادات هو ال Informational Marketing لأن هنا المريض بيكون محتاج يفهم تفاصيل التفاصيل.
الحالة التالتة هي المستشفي أو هيئة صحية؛ هنا شكل الدعايا بيختلف لأن لازم ناخد بالنا أن التسويق لكل اقسام المستشفي بكل دكاترها بأهدافها مذكورين بشكل مناسب لبعضه وماشيين تحت مظلة واحدة وهى المستشفي أو المنظمة. تاني حاجة هنا بيكون في نصيب من الدور التوعوي للمجتمع اللي بيزود المصداقية 3 اضعاف سواء للمنظمة أو المستشفى ولازم تتعمل بطريقة تشد زى الحملة التوعوية لمرضي السكر اللي اتعملت في تايلاند بقايدة جمعية مرضي السكري في تايلاند تحت العنوان:
“السكر بيقتل.”
2- وهما مين؟
بعد ما حددنا أنت مين لازم تكون فاهم الطريقة اللي توصل بيها للمرضي بتوعك أو لغتهم، ووضحنا ازاي تقدر تعمل ده في مقالة اسمها The buyer Persona: How to speak your customers’ language، المقالة ديه عامة بس مفيدة جداً، طب ايه اللي يخصك؟ أنك تكون فاهم الشعب المصري بيحب ايه ليه علاقة بيك في المجال الطبي وتستخدمه، خليني اشاورلك علي الطريق اكتر:
فيه طرق كتير في الماركيتنج بيتم بيها صناعة المحتوي Marketing Approaches، اهم الطرق ديه واكترهم استخداماً في المجال الطبي:
1- التسويق بالمعلومات Informational Marketing: وده وضحناه ووضحنا الهدف منه.
2- التسويق بالكوميديا Comedy Marketing: وديه طريقة تسويق قوية جداً معانا كشعب مصري بس في المجال الطبي لازم ناخد بالنا جداً لأن احياناً بتكون المواضيع حساسة فغير قابلة للهزار.
3- التسويق التأثيري Influence Marketing: وده بيكون عن طريق التعاقد مع مشاهير السوشيال ميديا أو الانفلونسرز Influencers عن طريق أنهم يزورا الدكتور أو المكان او يعملوا فيديو للمستشفي ويجربوا الخدمة.
4- التسويق بالسمعة Word Of Mouth Marketing: أقوي أنواع الماركتينج في كل المجالات وفي المجال الطبي بيكون عن طريق صور قبل وبعد أو الريفيوز.
5- التسويق بالمشاعر Emotional Marketing: وده نقطة تميز لدكتور عن التاني، اخليني احكيلك هنا عن قصة ورقة بحثية اصدرتها الجمعية الدولية للجراحة التجميلة سنة 2018 اللي بتقول أن الهرمونات والمحفزات اللى بتتفرز اثناء الاحساس بالالم الجسدى هى هى نفس الهرمونات والمحفزات اللى بتتفرز اثناء الاحساس بالألم النفسى، واحياناً المرضي ألهم النفسي هو اللي بيكون لازم تخاطبه اكتر من الألم الجسدي ومن هنا جت نقطة اللعب علي المشاعر، اللي بيخلي الناس متعلقة بيك أكتر من غيرك.
خلاص عرفت اني محتاج للتسويق الإلكتروني: الماركيتنج علي كام النهاردة بقي؟
علي رأي واحد تقيل في مجال الاونلاين ماركيتنج حضرتك عايزة صابح ولا بايت؟
بص عزيزي الدكتور القارىء، تحديدك للبادجيت المتاحة معاك هو اللي يحددلك هتلجأ لمين يساعدك يعني لو البادجيت صغيرة أنصحك تساعد نفسك لأن المبلغ ده يادوب يتصرف علي الإعلانات الممولة، هتساعد نفسك ازاي؟
1- اعمل فيديوهات ليك وانت بتتكلم عن مواضيع تهم الناس بطريقة تشدهم.
2- ارفع دايماً اراء الناس في شغلك والنتايج اللي بتحققها
3- عيد علي الناس واخلق معاهم تفاعل عن طريق الاستوريز
4- وديه نصيحة مننا وانت بتعمل ادز لنفسك؛ خلي بالك من سياسات مواقع التواصل الإجتماعي اللي بترفضلك إعلانات كتير زي: الموديلز أو الناس اللي موجودة في الفيديو يكونوا مش لابسين هدوم كفاية، وديه مشكلة بتواجه دكاترة التجميل بالاخص لأن فيه سياسات بتنص علي احترام العادات والتقاليد الموجودة الخاصة بالبلد. حاجة تانية ماينفعش نكتب في المحتوي اسم بلد يعنى ما تقلش “تقنية جاية من امريكا” قول “تقنية امريكية”، حاجة اخيرة صور قبل وبعد بتترفض في الدعايا عن طريق الإعلانات المدفوعة.
طب زادت البادجيت وبقت متوسطة، هنا هتقدر تقدر تجيب Freelancer يساعدك في حتة، يعملك تصمميمات محترفة، أو حد يساعدك بطريقة استهداف قوية أو حد يعملك فيديو بيتكلم عن خدمة عايز تسلط الضوء عليها.
طب خلاص معانا بادجيت محترمة نشتغل بيها، هتروح تتعاقد مع شركة متخصصة في الدعايا والتسويق هتكون بتوضحلك الخدمات اللي بتقدمها والخطة التسويقية ونتايجها المحتملة وكل ما البادجيت تزيد زود جزء تسويقي جديد: اعمل فيديوهات، اعمل ويب سايت وإلي اخره علشان توصل لناس أكتر واكتر.
العملية بسيطة:
انت دلوقتي بقيت فاهم أنت مين وبتكلم مين ومحتاج تكلمه ازاي واد ايه روشتة التسويق الإلكتروني لخدمة المجال الطبي مفيدة ليك. فنصايح سريعة اخيرة: التسويق مش حل سحرى ومش من اول بوست هتنزله هتوصل، ده حاجة لازم تواظب عليها باستمرار. اللي يقولك مش مهم الفلوس تعالالي انا بتاع كله وهساعدك، أرجوك ماتصدقهوش انت دلوقتي فاهم ان الموضوع ليه تفرعات كتير جداً فمستحيل واحد يعمل كل ده. واخيراً لو انت مكان ضخم لازم يكون جزء من التيم اللي شغال علي الدعايا والتسويق يكون موجود عندك علشان الموضوع يكون منظم ويجيب نتايج حلوة. وفي اخر المقالة انا بشكرك انك ادتني فرصة انى اساعدك، وبفكرك ان الشركة BSMART creative agency بتقدم استشارات مجانية تماماً لمدة 15 يوم، فلو محتاج تعرف تفاصيل اكتر، اتواصل معنا.